Bakurê Rojhilatê Sûriyê: Êrîşên Tirkiyê Av û Elektrîkê Qut Dikin

(Beyrût, 26ê Cotmehê, 2023): Rêxistina Human Rights Watch îro ragihand ku êrîşên firokeyên bê firokevan ên Hêzên Çekdar ên Tirk li ser herêmên di bin kontrola Kurdan de li bakurê rojhilatê Sûriyê di navbera 5 û 10ê Cotmeha 2023an de jêrxana bingehîn wêran kirin û bûn sedema qutbûna av û elektrîkê li ser milyonên kesan.
Komên sivîl gotin ku, êrîşên li ser bêhtir ji 150 cihan li bakurê û rojhilatê Sûriyê li parêzgehên Hesekê, Reqa û Helebê pêk hatin, bûn sedema kuştina dehên kesan di nav wan de sivîl jî, û gihiştina ziyanê bi avahiyên sivîl. Rêveberiya Xweser a Bakur û Rojhilatê Sûriyê ya bi serkêşiya Kurdan, ku herêmên armanckirî birêve dibe, piştrast kir ku êrîşên li ser wêstgehên av û elektrîkê bûne sedema "qutkirina bi temamî ya elektrîk û avê" li parêzgeha Hesekê. Herweha kargehên petrolê yên sereke û take kargeha xaza bikaranîna navmalê li bakurê rojhilatê Sûriyê jî ji ber êrîşan ziyan dîtin. Li bajarê Hesekê, nakokiya li ser avê ya berdewam ji dema êrîşa Tirkiyê ya sala 2019an ve bo ser deverên bakurê Sûriyê, mafê avê yê nêzîkî milyonek kesî, di nav de niştecih û civakên derbider, xistiye metirsiyê.